so, eben, das ist nun alles schon lange her. ausserdem gab's da noch tausende anderer dinge die ich gesehn und erlebt hab. Vielleicht kann ich dann den rest auch mal berichten :-)
cheers und bis bald wieder...
Abonnieren
Kommentare zum Post (Atom)
1 Kommentar:
Jo hoi Karin,
Sitze grad ir Bude u muess no usharre bis am 5i (es isch halbi vieri u öppis nöis afah lohnt sich nümme). Da isch mir i Sinn cho, sicher au wil d Sarah jetz bi dir isch, dass du ja no e blog hesch zum aluege. Bi scho lang nümme ga luege. Extrem schöni Landschafte hett's da, u die mega Bäum hätt i ou gärn gseh. Du gsehsch braungebrannt und entspannt us uf de Fotine.
Du hesch mir ja im Dezämber es Mail gschribe, und Danke au für'd Charte, si ligt uuf bi mir ir Stube mit em einsame Schaf wo irgendwo im Grüene blöökt;-)
Jetz wird's gschäftlich hurti, ha dänkt ig cha dir das ja o grad hie schribe, aso dr Branger.... dr Branger macht nid fürschi, das isch e lahmi Aente und langsam aber sicher närvt er mi. S Mietzinsdepot isch gäng no nid uszahlt, är stürmt gäng no öppis wäg dr Versicherig, jetz längts de mau.
Aber ebe, ig bliibe dran, damit DU e Monet länger chasch i däm schöne Land bliibe, u IG e Teil ane Laptop cha zahle wo i fürs Studium bruche. Genau, du hesch richtig ghört, ha mi ändlich entschiede u wirde im Septämber Umweltingenieurswäse afah. Ha jetz e Perspektive und das tuet cheibe guet:-))))) Aber villicht weisch das jo scho alles? Weiss nümm uf welem Stand du bisch...
I verzell dir jetz o no chli öppis vom chliiine, härzige, mängisch schisslängwilige (vor allem im Winter) Solothurn: Im Momänt isch grad Fasnacht, gester Chesslete, und ig ha e Kulturschock!!!!!!!!!
Bi letscht Wuche a de Filmtage gsi gah schaffe (Billetkontrolle), umgäh vo schwarzkleidete, kulturelle Wiitrinker, alli e chli abgspacet ufene Art, aber mit Stil. Han mit emene alte Regisseur im Chrüz Znacht gässe, dr Fotograf vo de Filmtag hett mi wöue abschleppe, e ältere, gepflegte Herr hett mi ufene gueti, warmi Art drzue überredt mit ihm no e Drink z näh (im Nachhinein han ig vom Regisseur, Johannes heisst dä, erfahre, dass dr Edi, ebenjener älterer Herr, e Multimillionär isch u x Chino's ir Schwiiz bsitzt), han e Musikproduzänt kenneglehrt wo mi gfragt hett ob i nächschte Mäntig mit wett ufenes Konzärt vo Heidi Happy und Pegasus, kurz u guet, meh oder weniger alles e chli intellektuelleri Lüt. U gester denn (Chesslete) dr absolut KONTRAST! Aso das Jahr chasch mi jage mit Fasnacht, es passt irgendwie grad so nid. Bi nach em schaffe id Stadt, ha no wöue e Fläsche Wii chaufe wil i hüt bir Isa zum Znacht iiglade bi, u denn isch aber nix Abendverkauf gsi. Drfür würklich, würklich jungi, schwankendi, extreeeeeeem bsoffni Gstalte. Mit Konfetti und Rätsche und so Züg. Und gstunke hei die! Nach düremache und nach Alk, buah. Das git doch so ne wunderbar miefige Gruch, weisch wele i meine?
:-)))) Item, das Jahr i nix Fasnacht. Probiere krampfhaft z flüchte, ke Ahnig wo ane, villicht gang i am Sunntig mau ids Pap oder i weiss doch ou nid, mau luege.
Süsch muess i säge isch alles bim alte, alli si no mit allne zäme, d Sarah und ig si geng no standhafti Singles, es isch nüt Nöis ufgange u ou nüt zuegange, es hett kes Erdbäbe gäh ir Schwiiz u ou süsch ke Katastrophe, au nüt speziell Herusragends süsch isch plant wie e Expo oder so, nur d Euro fangt de mau a das Jahr, aber das wirsch wahrschinlich no erläbe.
Halt, ei Skandal han ig vergässe wo öppe 3 Wuche lang i de Zytige isch gstande!!!! Uesi Schwiizer Cervelat isch gfährdet!!!! U zwar wil mir nümme argentinischi (oder brasilianischi?) Rinderdärm dürfe importiere für'd Cervelat wäg der EU Norm. Es wird fliissig dran gschaffet jetz das Problem z behebe, wobii Alternativene (Künstlichi Därm, anderi Därm) wäge Gschmacksverlust/veränderig nid wirklich in Frag chöme. So wie i informiert bi, verhandle si jetz mit dr EU ob me das Import Verbot chönn ufhebe. SKANDAL!!!!:-)
Settig Problem hei mir hie, isch das nid schön? Ues geits scho cheibe guet, heilandgüegelinomau!!!! Aah, Momänt, ei Neuigkeit han ig doch no vom nähere Umfäld, d Isa zieht uf Bärn! U i gah se sicher öppe die mau gah bsueche, us nid ganz uneigenützige Gründ (si weiss es scho), nämlich dass i de e bizz länger cha schlafe u nid so früeh muess ufstah für zum gah bügle, hihi. U de no chli z Bärn i Usgang und so, hie hett's nämlich schöni, männlichi Gschöpf so ab und zue. Emu chli meh als z Solothurn.
Sooo, jetz weiss i grad nüt meh...
hmmmmmmmmmmmmmmmmmmmmmmmmmmmmm.
*grübelgrübel*
*zumfensterrausglotz*
*studier*
Nei sorry, isch würklich grad nüt meh:-))
Karin, i drück di feste (nomau e Evadrücker) und küss di und wünsche dir wiiterhin e warmi, gueti Zyt uf Reise, wiiterhin schöni Erläbnis, gueti Mensche um di ume.
Stäi kuul Bäib;-))
Eva
Kommentar veröffentlichen